زائر حرم کے کیف وسرور کی ترجمانی ، نظم۔

از قلم: حضرت مولانا محمد انوار الحق نادم قاسمی حفظہ اللہ استاد حدیث مدرسہ عبداللہ ابن مسعود حیدرآباد*

 نگاہ بھر کر عنایتوں کا نظامِ پروردگار دیکھو 

حرمؔ کے چاروں طرف برستی وہ رحمتوں کی پھوار دیکھو

  عجب نظارا مطافؔ میں ھے خدا کے بندوں کی بندگی کا 

حیات انگیز منظروں کو ٹہر کے لیل و نہار دیکھو

  ہر اہک رب کو منا رہاھے چمٹ چمٹ کر کے ملتزمؔ سے

  ہر ایک بندہ کے ذہن و دل میں عجیب دھن ھے سوار دیکھو

  برہنہ پاؤں برہنہ سر ھے کوئی اِدھر ھے کوئی اُدھر ھے

  رضاۓ مولیٰ کی جستجو میں وہ کیف اور اضطرار دیکھو

  صفاؔ و مروہؔ کی سعئ پہیم سے ڈھل رہی ھے حیاتِ برہم

  وہ ہاجرہ ماں کی روح پرور تڑپ کی ھے یادگار دیکھو

  براہِ میزابؔ رحمتِ رب برس رہی ھے حطیمؔ میں بھی

  اُسی کرم کو سمیٹنے میں ہیں کتنے سب بے قرار دیکھو 

 تلاشتے ہیں ہر ایک زائر طواف کے بعد جس جگہ کو 

 وہ نقشِ پاۓ خلیلِؑ رب کا سُنہرا نقش و نگار دیکھو

  وہ ایک سو بیس جس پہ رحمت خدا کی ہر دم اُتر رہی ھے

   ہمارا قبلہ وہی ھے کعبہؔ لپک کے تم بار بار دیکھو

  وہ آبِ زمزمؔ ھے جس سے وابستہ جاں نثاری کا پیارا قصہ

  جہاں کو سیراب کر رہا ھے وہ اب تلک آبشار دیکھو

  ھے مہبطِ وحئ رب یہ مکّہ ھے قابلِ رشک ذرّہ ذرّہ

  خدا بلاۓ اگر کبھی تو یہاں کی باغ و بہار دیکھو 

 وہ لمسؔ یا استلامؔ جس نے بھی کرلیا جنّتی حجر کا

  بفضلِ رب ان کے نیک جذبوں میں حسن دیکھو نکھار دیکھو

  میانِ اسودؔ و رکنِ یمنی کی جو فضیلت سے باخبر ہیں

  زبان پہ ان کی "ربّنا" کی "واٰتنا" کی پُکار دیکھو

 

 کریم داتاؔ کی بارگہ میں ہزاروں امید لیکے نادمؔ 

 ندامتوں کے دو چند قطروں سے یہ بھی ھے اشکبار دیکھو ۔۔۔۔